Kinukuha pala ng Lakas-Kampi si Sen. Ramon “Bong” Revilla Jr. na bise president para sa kanilang presidential candidate na si Defense Secretary Gilbert Teodoro.
Ini-report ng Philippine Star na sabi daw ni Revilla, handa raw siya na maging bise kay Teodoro kung makukuha niya ang ng basbas ng kanyang ama na si dating Senador Ramon Revilla Sr.
Sabi sa Star, “Unang binalak ni Bong na tumakbong bise presidente ngunit nang ma-stroke ang nakatatandang Revilla ay hiniling nito sa anak na muling na lamang kumandidatong senador para sa kanyang ikalawang termino.
Sabi pa ng Star, “Ngunit muling nabuhay ang posibleng pagtakbo muli ni (Bong) Revilla bilang bise presidente nang mawalan ng running mate si Teodoro, napipisil na presidential candidate ng administrasyon.”
Nawalan kasi ng VP si Teodoro nang biglang umatras sa planong pagtakbong pangalawang pangulo si Interior and Local Government Secretary Ronaldo Puno. Naisip yata nina Arroyo na mas makatulong si Puno sa kanyang kandidato kung sa DILG si Puno kasi kontrolado pa rin niya ang local governments.
Mabuting kumbinasyun itong Teodoro-Revilla. Kasi di ba ang campaign slogan ni Teodoro ay “Galing at Talino”. Balanse na ang tiket nila.