Sumulat sa akin si Atty. Howard Calleja, na binabatikos ngayon dahil sa kanyang pagtanggap kay Zaldy Ampatuan bilang kliyente.
Kasama si Zaldy sa nakasuhan ng multiple murder sa masaker ng 58 na tao, 32 doon ay mga journalists, noong Nobyembre 23, 2009. Ang itinurong nagsagawa ng masaker ay ang kanyang kapatid na si dating Mayor Andal Jr. Sabit din ang kanilang ama na si Andal Sr. Sobra isang daang tao ang nakasakdal sa kasong ito.
Pinuna ko si Calleja sa aking kolum noong isang buwan. Nadismaya ako sa kanya dahil kilala ko si Howie bilang ma-prinsipyo na abogado. Abogado siya nang Parish Pastoral Council for Responsible Voting, isang organisasyun na ang misyun ay malinis at maayos na eleksyun. Alam naman natin kung anong eleksyun ang pinaiiral ng mga Ampatuan sa Maguindanao. Ang tawag nga doon bangko ng mga boto. Magdeposito ka lang ng cash, makukuha mo ang boto na gusto mo. Tanungin nyo si Gloria Arroyo at si Sen. Juan Miguel Zubiri.