Ayan, may assignment na si Ambassador for Peace and Understanding Manny Pacquaio.
Sa interview ni Judge Jorge Emmanuel Lorredo sa ANC, tinatawagan niya ang champion na boksingero na pumunta sa hearing ng kasong perjury na isinampa ni Mike Defensor laban kay Rodolfo “Jun” Lozada sa Mayo 28 sa Manila Metropolitan Trial Court Branch 26.
“Nanawagan ako kay Pacquiao na pumunta siya sa May 28 sa courtroom ko, I will allow him to talk to Mike Defensor and Jun Lozada,” sabi niya.
Noong Biyernes, nagpiyansa si Che-Che Lazaro, ang kilalang host ng Probe Team, ang TV news-magazine sa ABS-CBN kaugnay sa kasong wiretapping na isinampa ng isang opisyal ng GSIS laban sa kanya.
Si Rez Cortez, actor na masugid na taga-suporta ng namatay na si Fernando Poe, Jr, ang dinaya ni Gloria Arroyo, ay nag-apela ngayon sa Court of Appeals dahil sa arrest warrant na na-isyu laban sa kanya at kina Samuel Ong, ang dating director ng National Bureau of Investigation na naglabas ng “Hello Garci” tapes, ang kanyang driver na si Angelito Santiago at negosyanteng si Wilson Fenix.
Ito ay nangyayari habang patuloy ang paguusig kay Jun Lozada, ang star witness ng NBN/ZTE, ni Mike Defensor, dating presidential chief of staff ni Gloria Arroyo na ngayon ay pinuno ng Philippine National Railways.
Update: Judge Lorredo allowed Lozada to be under Senate custody.
Kung nakakahawa ang masama, ganuun din ang kabutihan at katapangan. Nanindigan si Jun Lozada. At ito, nakita rin natin na naninindigan ang judge na humahawak ng kanyang kaso, si Judge Jorge Emmanuel Lorredo.
Dinala sa Medical Center Manila si Lozada noong Martes ng gabi dahil sa dehyration. Mabuti na rin daw ang lagay niya ngayon.
Naka-schedule siyang i- arraign sa sala ni Judge Jorge Emmanuel Lorredo ngayong araw at 8:30 ng umaga. Bago niyan magkakaroon ng pagdarasal. Sabi ni Lorredo sa kanyang pambihirang order na maaring sumali ang mga iba’t-ibang grupo na sumusuporta kay Lozada sa morning prayers . Sabi pa niya gusto ng Supreme Court na simulan ang sesyon sa korte ng pagdarasal.
May kumpirmado ng biktima ang A(H1N1) o swine flu sa Hongkong kaya lalong itinaas ng Department of Health at National Disaster Coordinating Council ang alerto.
Ang biktima ay 25-taong gulang na lalaki. Galing daw sa Mexico, ang sentro ngayon nitong epidemic (pandemic na nga ang sabi ng iba opisyal. Ibig sabihin, pangkalahatang mundo na) na dumaan sa Shanghai. Mabuti pa naman daw siya ng nasa Shanghai siya ngunit nang dumating sa Hongkong ay nagkaroon siya ng lagnat.
Kaya praning na praning ang mga opisyal ng Hongkong dahil noong 2003, nang umatake ang SARS, tinamaan din sila at 229 ang namatay doon.
Ano pa ba ang magagawa nating mamamayan sa mga halos 50 na walanghiyang congressman na nasa Las Vegas ngayon para manood ng Pacquiao-Hatton fight sa gitna ng kahirapan ng sambayanang Pilipino?
May isang namatay na sa swine flu sa Nevada.
Sinulat ko sa Facebook ang aking muni-muni, “Masama ba kung hilingin ko na sana magkaroon ng swine flu ang mga congressman na nandun sa Las Vegas para manood ng laban ni Pacquiao?”
Sa aking pag-uusap sa marami sa mga batang opisyal ng military na nakasama sa grupong Magdalo, nakikita ko and sinsero nilang pagmamahal sa bayan.
Napansin ko rin na malawak silang mag-isip at matatalino sila. Maari sigurong sabihin natin na nagkulang sila sa aspeto ng operasyon sa kanilang ginawang panindigan laban sa administrasyong Arroyo, ngunit handa silang magsakripisyo para sa ina-akala nilang tama.
Hindi naman lahat. Dahil mayroon din naman mga bumaligtad at mukhang namang ina-alagaan sila ng husto ng pamahalaang Arroyo.
Iwasan daw muna ang magbeso-beso, sabi ni Agriculture Secretary Arthur Yap dahil sa swine flu na umaatake ngayon sa Mexico.
Sa mga report kahapon sobra isang libo na ang natamaan ng swine flu sa Mexico at 81 na ang patay. Dahil sa bago itong virus na galing daw sa mga baboy, wala pang gamot para talaga duon. Mga gamot na gamit dati sa bird flu ang ginagamit ngunit mukhang hindi masyado raw umuubra.
Pinagbawal na muna raw ang pag-angkat ng mga baboy sa Mexico at sa United States. Sabi ni Yap hindi naman daw apektado ang mga baboy natin dito sa Pilipinas at basta lutuin lang daw ng husto, okay lang.
Sa isyu ng mga taong malapit sa mga Arroyo na nakasama sa bagong sectoral representatives katulod ni Maria Lourdes Arroyo at retired Gen. Jovito Palparan, sabi ni Press Undersecretary Anthony Golez na kahit ano pang ngak-gnak ng mga kritiko, yun ay batas at wala na silang magagawa.
Oo nga naman, ano naman ang magagawa ng mga tao kahit alam nilang binabastos na ang diwa ng batas nitong batas sa partylist.
Noong Martes nadagdagan ng 55 ang 22 na partylist representatives sa Kongreso ng inutusan ng Supreme Court and Commission on Elections na sundin ang bagong formula sa pagsunod ng batas para sa partylist.
Mukhang nararamdaman ng mga adviser ni Arroyo na mahirap nilang ipilit ang Charter Change para manatili si Arroyo sa kapangyarihan, sabi ng isang kakilala namin sa Malacañang.
Kaya ngayon daw, ang kanilang strategy ay hindi para mapalawig pa ang kanyang kapit sa Malacañang kungdi kung paano siya maprutektahan kapag hindi na siya presidente.
Ang gusto lang daw niya ngayon ay magkaroon ng immunity from suits o hindi siya sasampahan ng kaso kapag hindi na siya presidente.
Related article in Malaya: Ridiculous, seafarers’ group says of Aden Gulf ban
Tuwing may balitang may naha-hijack na namang barko ang mga pirata sa Somalia, ako ay kinakabahan dahil may mga kamag-anak ako sa probinsya na nasa barko.
Mahirap, kasi hindi naman palagi nilalabas ang pangalan. Sa awa naman ng Diyos, safe naman ang mga kamag-anak at kakilala ko ngunit ipinagdadasal ko rin ang mga humigit-kumulang 300 na Filipino seaman na nasa kamay ng mga pirata sa Somalia ngayon.
Mahirap sundan kung ilan na ang mga Filipino hostages ng mga pirata dahil pakawalan ang 20 ngayon, kukuha na naman sila ng panibagong barko sunod na araw. Sa dami ba naman ng Filipino na seaman, hindi maa-aring walang Pilipino na kasama.