Mahabaging Dios, patigilin mo na si Sen. Sotto

Mahabaging Panginoon, ako ay lumuluhod at nagmamakaawa sa iyo na kung maa-ari, patigilin mo na si Sen. Tito Sotto sa kaka-privilege speech laban sa Reproductive Health bill.Hindi ko na ma-take.

Maawa naman kayo sa mamamayang Pilipino. Alam ko maraming nangyayari dito sa bansa na hindi kanais-nais at dapat lang siguro may kaparusahan para mabigyan kami ng leksyun. Ngunit huwag naman itong parusa sa pamamagitan ng pagkakalat ni Sotto.

Kahit ayaw ko panoorin, nasa TV siya. Siya at ang kanyang kapalpakan ang laman ng Facebook at Twitter. Nakaka-stress. Nakapagbitaw tuloy ako ng hindi kanais-nais na salita. Ako pa ngayon ang nagkapag-commit ng kasalanan.

Kapag meron pa siyang isang speech, baka makakarami ako ng kasalanan. Sa impyerno na talaga ang bagsak ko. Huwag naman po, Panginoon.

Mahirap talaga ma-take ang mga pinagsasabi ni Sotto.

Pwede na pagpasensyhan ang una niyang pagkakamali na nangupya ng sinulat ng isang blogger. Ang masama, hindi niya alam na mali ang ginawa niya. Ang pangungupya ay pagnanakaw. Pagnanakaw ng ideya.

Hindi masama ang gamitin ang sinulat at sinabi ng ibang tao. Bigyan mo lang ng na-ayon na credit. Ano ba naman ang hirap kapag sabihin, “Ayon sa isang blogger na si Sarah Pope.”

Ang isa pang masama, malakas pa ang loob niya at ng kanyang chief -of -staff na si Hector Villacorta magsabi na ordinaryong gawain ang pangungupya (plagiarism).

Porke ba ginagawa ng marami, okay na? Ang mali ay mali.At kahit garapalan na ang paggawa, hindi yun nagiging tama.

Napunta ang usapan sa Constitution at Bibliya. Despalinghado ang argument. Ang sakit sa ulo pakinggan.

Noong isang linggo, humirit na naman si Sotto. Lalong mas grabe. Nakakawindang ang kanyang definition ng translation. Akala niya kapag na-translate niya sa Tagalog ang sinulat at sinabi ng isang tao, ay kanya na at hindi na kailangan ibigyan ng credit ang orihinal na nagsalita o sumulat. Nawiwindang ako.

Ang kinupyahan pa naman niya ay ang namayapang si Robert Kennedy,dating U.S attorney general. Sa talumpati ni Kennedy noong 1966 sa University of Capetown sa South Africa, sinabi niya:
“Few will have the greatness to bend history itself, but each of us can work to change a small portion of events, and in the total of all those acts will be written the history of this generation.”

Sabi ni Sotto: “Iilan ang magiging dakila sa pagbali ng kasaysayan, subalit bawat isa sa atin ay maaaring kumilos, gaano man kaliit, para ibahin ang takbo ng mga pangyayari. Kapag pinagsama-sama ang ating munting pagkilos, makalilikha tayo ng totalidad na magmamarka sa kabuuan ng kasaysayan ng henerasyong ito.”

Isinalin lang niya sa Tagalog ngunit hindi niya sinabing galing ito sa talumpati ni Kennedy.

Sabi rin ni Kennedy:

“It is from numberless diverse acts of courage and belief that human history is shaped.”

Sabi ni Sotto:

“Ang mga hindi-mabilang na iba’t ibang galaw ng katapangan at paninindigan ang humuhubog sa kasaysayan ng sangkatauhan.”

Sabi ni Kennedy:

“Each time a man stands up for an ideal, or acts to improve the lot of others, or strikes out against injustice, he sends forth a tiny ripple of hope, and crossing each other from a million different centers of energy and daring those ripples build a current which can sweep down the mightiest walls of oppression and resistance.”

Sabi naman ni Sotto:

“Tuwing naninindigan tayo para sa isang paniniwala, tuwing kumikilos tayo para mapabuti ang buhay ng iba, tuwing nilalabanan natin ang kawalan ng katarungan, nakalilikha tayo ng maliliit na galaw. Kapag nagkasama-sama ang mumunting galaw na mga ito, bubuo ito ng isang malakas na puwersang kayang magpabagsak maging ng pinakamatatag na dingding ng opresyon.”

Mahal na Panginoon, kapag hindi nyo pinigilan si Sotto, sa susunod baka Bibliya na ang i-plagiarize niya.Ikaw rin, baka pati “Ten Commandments” aakuin niyang kanya.